దాదాపు ఆరు దశాబ్దాల తర్వాత మొదటిసారి ఓ మహిళకు విధిస్తున్న మరణశిక్షను అమెరికా ఫెడరల్ కోర్టు తాత్కాలికంగా వాయిదా వేసింది. సదరు మహిళా దోషి తరఫు న్యాయవాదులు.. కరోనా వైరస్ బారిన పడగా ఫెడరల్ న్యాయమూర్తి ఈ నిర్ణయం తీసుకున్నారు.
'లిసా మాంట్గోమరీ' అనే మహిళకు డిసెంబర్ 8న ఇండియానాలోని టెర్రె హాట్ కారాగారంలో మరణ శిక్ష విధించేందుకు అధికారులు సిద్ధమయ్యారు. కానీ, ఆమె తరఫున వాదించే కెల్లీ హెన్రీ, అమీ హార్వెల్ అనే ఇద్దరు న్యాయవాదులకు కొవిడ్ పాజిటివ్గా తేలింది.
మాంట్గోమరీ తీవ్రమైన మానసిక రుగ్మతతో బాధపడుతున్నారని న్యాయవాదులు కెల్లీ, హార్వెల్ చెబుతున్నారు. తనంతట తానుగా క్షమాభిక్ష పిటిషన్ దాఖలు చేసే పరిస్థితుల్లో మాంట్గోమరీ లేదని అంటున్నారు. తన మానసిక సమస్య కారణంగా మరే ఇతర న్యాయవాదులను మాంట్గోమరీ విశ్వసించడం లేదని వారు కోర్టుకు తెలిపారు. తాము కరోనా బారిన పడ్డ ఈ పరిస్థితుల్లో ఆమెకు శిక్షను వాయిదా వేయాల్సిందిగా న్యాయస్థానాన్ని కోరారు. న్యాయమూర్తి అందుకు సానుకూలంగా స్పందించారు.
2004లో ఓ గర్భణీని గొంతునులిమి చంపి.. ఆమె కడుపును కోసి శిశువును తీసుకు వెళ్లిందనే నేరంలో మాంట్గోమరీ దోషిగా తేలింది. న్యాయస్థానం ఆమెకు మరణ శిక్ష విధించింది. దాదాపు 60 ఏళ్ల తర్వాత అమెరికాలో మరణ శిక్ష పడ్డ తొలి మహిళగా మాంట్గోమరీ నిలిచింది.
ఎనిమిదో మరణశిక్ష..
మరో ఘటనలో.. ఓ పదహారేళ్ల బాలికను కిడ్నాప్ చేసి, అతి కిరాతకంగా హత్యాచారానికి పాల్పడిన కేసులో దోషిని ఉరితీయడానికి అమెరికా సుప్రీం కోర్టు మార్గం సుగమం చేసింది. 1994లో ఈ లీసా రేనా అనే బాలికపై ఐదుగురు వ్యక్తులు ఈ ఘాతుకానికి పాల్పడ్డారు.
దాదాపు రెండు దశాబ్దాల తర్వాత ట్రంప్ హయాంలో ఉరిశిక్షలను అమలు చేయడం ప్రారంభమైంది. ఈ ఏడాది ఇది ఎనిమిదో మరణ శిక్ష.
ఇదీ చూడండి:'బాధ్యతా రాహిత్య అధ్యక్షుడిగా ట్రంప్ నిలిచిపోతారు'
